ممكن ابتسامة لو سمحت

أكيد كلنا بنمر بفترات عصيبة فى حياتنا ويمكن كمان بشكل يومى

واكيد كمان ان ظروف الحياة عند كتير مننا أقسى من أن تحتمل

وواضح كمان ان معظمنا لما بيخطر بباله يبص لبكرا بيشوف قدامه مرايا سودا

لكن ممكن نقف هنا لحظة واحدة ونفكر؟

يا ترى ايه العمل؟

ولو فكرنا هنكتشف الاتى:

أولا ان فيه فى حياتنا أشياء بتحصل خارجة عن ارادتنا ودى ممكن تكون مسببة تعاسة للبعض

ودى هى اللى بيسموها "ماليس منه بد"

وبيقولو كمان ان حلها " الرضى بما ليس منه بد"

ليه بقى؟ .. لأنه زى ما قلنا " ليس منه بد"

يعنى الرضا أو عدم الرضا مش هيغير كتير.. يبقى ناخدها من قصيرها وتيجى مننا أحسن

وأمثلة دا كتير زى ظروف حياتنا ونشأتنا وشكلنا وأحوالنا الأجتماعية وحاجات من دا كتير

يبقى اتفقنا ان الحل فى الحالة دى هو الرضا بما ليس منه بد

ييجى بعد كدا بقى ما منه بد

يعنى صحيح ان ظروف حياتنا لقيناها بشكل معين لكن أكيد فيها جوانب قابلة للتغيير

يعنى اننا نتعب فى التعلم والدراسة أو فى الشغل أكيد دا هيغير حاجات كتير فى حياتنا

جايز حد يسأل طب واللى اتعلموا أخدوا ايه

أو يسأل : وهو فين الشغل

والحقيقة انى مؤمن بأن الحياة بقيت صعبة قوى,

لكن مافيش شك ان الفرصة لسا موجودة, بس أصعب بكتير من زمان

يعنى مطلوب منك مستوى عالى جدا من الكفاءة

زمان كنت تلاقى شغل بألى شهادة لكن دلوقتى بالبكالريوس هتلاقى منافس

تاخد الماجستير تلاقى منافسين برضه .. وحتى لو معاك الدكتوراة كمان

بس أكيد فى كل مرحلة من دول فرصك هتتحسن واهو على الأقل تكون مستعد للفرصة اللى ممكن تخبط على بابك

المهم انك تاخد بالأسباب وتسيب الباقى على ربنا

طبعا الايمان هنا مهم, ايمان التوكل وليس التواكل, خد بالأسباب وخليك مطمئن القلب

يبقى دلوقتى احنا واخدين بالأسباب وقدامنا معوقات ومشاكل الحياة ومطالبين اننا نتعامل معاها

وفيه سكة من اتنين:

يا اما نتعامل معاها بأعصابنا ونستلقى بقى وعدنا من حرق الدم وارتفاع الضغط وأمراض القلب والسكر

والقولون العصبى وقرحة المعدة

يااما نحاول نبتسم على أد ما نقدر

والنتيجة فى الغالب ان التكشير والهم مش هيقدم كتير

بالعكس دى طريقة منفرة وممكن تجيبنا ورا

دا اضافة الى انها هتدمر صحتنا

يبقى لو سمحتوا ممكن من دلوقتى نرفع شعار الابتسامة

حتى لو البداية صعبة, يا ريت نحاول وأكيد هنشوف النتيجة

هنشوفها لما تترسم على وشوشنا البشاشة وفى قلوبنا الطمأنينة

ونشوف انعكاس دا على وشوش الناس اللى بنتعامل معاهم

يا ريت نجرب