من رسائل القراء

صديقى الراوى بما إن محدش عبرنى ولا "بل ريقى بكلمة" عن سؤالى .... و لا حتى الإستاذ إبراهيم ذو العقل النير .... أنا مضطر أقلك إمتى تبقى "مشكلةحياتك....إن إحنامعاااك" * لـما تكون مشترى فطارك ... يا دوب سندوتشين طعمية "حيث إن الرغيف بقى بجنيه, و طبعا حضرتك مش هايهون عليك تدفع غيرةللفطار" و يبتليك ربنا بصديق غلس يبص لك فيه و ياخد نصه أو أكتر و يقول لك "اللى ياكل وحده يزور...إحنا معاك"!* و لما تكون واقف ى طابور العيش اللى هزم طوله طول قطر البضاعة ... و تلاقى واحد غلس خبطك كتف و قال لك "ياخى وسع....إحنا معاك"!* و لما ربنا يكرمك أول الشهر و تحب تعزم شريكة حياتك فى مكان راقى ... لتمتع عينيك من إبدال النظر فى عينيها تارة ...و على النهر الخالد تارة... و برضه تلاقى نفس الشباب التافه "اللى مسمى نفسه روش" و تلاقى عينيهم هاتاكلكم و لسان حال صفاقتهم يقول "اللى إداك يدينا يا سيدى ... إحنا معاك... للصبح"!* و لما تلحق لك مكان فى ميكروباص "فى يوم حر و خنقة" ... و أتارى الكرسى مش لواحد بس ...و تلاقى واحد نفخ بغيظ ..."إتااخر يا أستاذ...إحنا معاك"! .... وعن إذنك لإن فيه واحد صاحبى عاوزنى أقوم من على الكمبيوتر و بيقول لى..."كفاية يا عم ...إحنامعااااك"!!!!
07 مايو, 2008 07:31 ص

dr. x

الفول ولا الفوليك

علاقتى بالفول أزلية زى أى مصرى

ارتباط روحى من الصعب انك تفك منه

يمكن لانه لحد زمن قريب كان هو الصديق الصدوق

وكانت لما الدنيا تقفل فى وشك

وتقفل فى وشك كمان محلات اللحمة والفراخ والذى منه

مش بتلاقى غير الفول هو اللى يلبى نداك

ويقولك " احنا معاك"..

وباقول لحد زمن قريب لان اليومين دول

حتى الفول أصبح صعب المنال

يعنى زمان كنت تجيب بربع جنيه فول يأكل البيت

انما دلوقتى تلاقى اليافطة متعلقة عند كل بتوع الفول

" لا يوجد فول بأقل من مية قرش"

وليه ما كتبش جنيه ما تعرفش

لكن برغم ده يظل الفول هو الأرحم بيك

هو الحضن الحنين فى وش الغلاء الشديد

ودى أهم مميزاته

وان كان طبعا لا يخلو من مزايا أخرى

منها تعدد الأصناف اللى بتتعمل منه

أطباق شهية مالهاش حل

ومع كل اضافة يطلعلك اختراع جديد عشان ما تزهقش

يعنى لو كلت النهارده طعمية تاكل بكرا بصارة

ولو كلت النهارده فول بالسمن " لو انت قد كدا يعنى"

تاكل بكرا فول بالزيت

ناهيك عن ان كل طبق يضاف الى جواره بيزيد النكهة

البصل والسلطات والمخلل وغيره

ربنا يديمها نعمة ويحفظها من الزوال

يبقى بالزمة الفول أهم ولا الفوليك