الدنيا حر وريقى ناشف
وحبيبى كلمنى فى التليفون وقال انه جاى يزورنا النهارده
وقفت فى البلكونة استناه
الشمس مولعة نار وانا مدارية عنيا بكراسة أخويا الصغير
انا مش عارفة الناس اللى ماشية فى الشارع مستحملة العذاب ده ازاى
بالزمة البطالة مش أحيانا بتكون نعمة
المهم انك تلاقى اللى يأكلك ويشربك
هل هلالك يا حبيبى
شايفاه يا حرام جاى من بعيد تعبان وعرقان
هاهاها.. القمر جايبلى بطيخة معاه
جريت على الباب افتحله واستناه على السلم
ابتسامته وهو تعبان وحران وشايل البطيخة تجنن
جريت عليه أشيل منه البطيخة
أنا : يا حبيبى!!.. بس البطيخ غالى اليومين دول
هو: ما يغلاش عليك يا جميل
أنا: تسلملى يا نور عنيا ودخلت القة وانا باغنى
بطيخ حبيى يا ماء الورد
وضحك وهو بيقعد ويمسح العرق
أنا: لكن ايه اللى طلعها فى دماغك تجيبلى بطيخ
هو: نوع من التغيير
لقيت اللى يجيب لحبيبته وردة
اللى يجيبلها دبدوب
وانا بينى وبينك فكرت فى كدا
لكن الحر حسم الاختيار
وعلا صوت البطيخ " عالسكين"
الاغراء كان أقوى منى
رغم ان نار أسعاره زى نار الصيف وأشد
وضحك حبيبى وقال:
وعلى فكرا البطيخة دى أغلى من الورد والدبدوب
واهو قلت أعودك على حياة الموظفين والرجوع بالبطيخة من دلوقتى
قومى بقى قطعيها وحطيها فى التلاجة
مش برضه بطيخة المحب خروف
هناك 4 تعليقات:
صديقى الراوى
أما أنا لو رحت لحبيبتى معايا بطيخة... هأعمل زيك بالضبط ... و قبل ما أى حد يمس قلب بطيختى ..الغالية ...هيكون إعلان الراديواللى فى الصورة... منطلق يهز أركان بيت حبيبتى...و أبقى ضربت عصفورين بحجر!
بس يا خوفى لتعمل زى مديحة حمدى فى الفيلم... و يكون مصير البطيخة زى مصير كباية الدوا المسمومة... فى الحالة دى .... هأعمل فيها زى ما عمل الضابط "رشدى أباظة" ... فى المجرم أحمد إبراهيم ؟
و أيقى أنا قاطن فى دير المنحوس ...مش دير النحاس ؟؟!
مش برضة أحسن أجيبلها حاجة يتقال عليها مسمومة... بس ضد الكسر!
بص يا عم الراوى
إما تكون قد المدونات....و قد الإسم....راااوى....يعنى مش بيبطل كلام ...أو تقعدلك على جنب كده....و تسيب الإدارة للقراء... يا عم ده أنا بأدخل عالمدونة أكتر منك.... و لا الرقم المطلوب غير موجود بالخدمة....ياخى اللى ما رديت على تعليقات و لا على سؤلات..... إشحن و كلمنى!!!
س: ما العلاقة بين البطيخ...و رقبة العرب؟؟؟؟
ج الإثنيــــن....عــ ــالــسكــيــن!
شكرا للاخ ماليكش صالح على النصيحة
واسف للتقصير فى الرد
لكن دايما لما يكون التعليق سؤال انا بارد
ومنكم نستفيد
احنا شعارنا " احنا معاك"
ماحدش بقى يقول ماليكش صالح
إرسال تعليق