احنا معاك

احنا معاك .. مش حقيقة لكتير مننا لكنها حلم جميل
وانا صغير لما كنت ازور جدتى كانت دايما تحكيلى عن زمانهم وزمانا ..
زمانهم اللى كان بسيط لكنه جميل
وأجمل ما فيه انك تلاقى دايما اللى يقولك "احنا معاك"
معاك فى فرحك وحزنك .. معاك فى اللعب والجد
ما كانش مصطلح الوحدة معروف أيامها
وفى أيامنا العلم ادانا اختراعات كتيرة المفروض انها تقربنا من بعضنا
وكل ما العلم يقدملنا تكنولوجيا تواصل جديدة كل ما نبعد عن بعض أكتر
كل ما العالم يبقى قرية صغيرة نتحول احنا لجزر منعزلة فى محيط واسع
الغربة معششة جوانا واحساس الوحد مالينا حتى واحنا فى وسط الناس
روابط انسانية بتضعف وتدوب يوم بعد يوم
لكن لازم يكون فيه حل
لازم نفوق لنفسنا شويا ونسأل ايه اللى جرالنا وليه بقينا كدا
احنا بنبعد عن بعض ليه
فين الحب وفين الصداقة
ليه على طول حاسين بالغربة
لازم ارجع اخبط على بابك وتخبط على بابى
لازم نتلم حوالين بعض من تانى عشان نحس بالدفا
لان برودة الحياة جمدت اطرافنا وقلوبنا كمان
لازم نرجع نقول لبعض من تانى
ما تقلقش .. انت مش لوحدك فى الدنيا
احنا معاك.